名瞞戇族

格大維 (積遜蘇迪堅斯 飾) 係個有原則的大麻小拆家，顧客層面非常廣泛，有廚師、中產阿媽…唯獨未成年少年免問。以為咁樣就唔會瀨嘢？答案係：錯哂。為了掩飾身份，佢一直保持低調；但一次出手幫鄰居解圍點知好心著雷劈，反被三個古惑仔搶走所有大麻同現金，令佢缺落拆家班主高列畢 (艾希姆斯 飾) 一身債。大維唯有幫高列畢由墨西哥走私大麻返美國來還債；為求低調過境又唔使坐監，大維不惜威逼利誘一眾鄰居：性感鋼管舞女郎露絲 (珍妮花安妮絲頓 飾)、未夠秤準買家毒男堅尼 (威爾保爾特 飾) 同叛逆少女姬思 (愛瑪羅拔絲 飾) 扮成美國典型温馨家庭，一家四口扮姓「米」參與呢個「疑似實無死」任務。一個假老婆、兩個假仔女，再加一大架 RV 旅行車，「米氏一家」喺美國獨立日出發去墨西哥食大茶飯，引發聯串囧人膠事。